ملتان: قومی احتساب بیورو (نیب) ملتان نے گورنمنٹ گریجویٹ کالج برائے خواتین ممتاز آباد میں “کرپشن کی سماجی برائی کے خلاف جنگ میں خواتین کا کردار” کے موضوع پر ایک آگاہی سیمینار کا انعقاد کیا۔ تقریب کے شرکا ء میں مہمان خصوصی مس کائنات اظہر (سپرنٹنڈنٹ آف پولیس) سمیت مس انعم خان (اسسٹنٹ ڈائریکٹرنیب)، مس منیزہ منظور بٹ (ڈسٹرکٹ ویمن پروٹیکشن آفیسر)، کالج کی پرنسپل مس حفصہ، دیگر فیکلٹی ممبران اور طالبات کی بڑی تعداد نے شرکت کی۔مہمان خصوصی مس کائنات اور مس منیزہ بٹ نے شرکاء سے خطاب کرتے ہوئے زور دیا کہ کرپشن ان بڑی سماجی برائیوں میں سے ایک ہے جو قومی ترقی کی راہ میں رکاوٹ ، اداروں کو کمزور اور عوامی اعتماد کو مجروح کرتی ہے۔ انہوں نے اس بات پر بھی زور دیا کہ خواتین، معاشرے کے کلیدی ستون اور خاندانوں کے اندر بنیادی اثر و رسوخ رکھنے والی ہستیوں کے طور پر، ایمانداری، ذمہ داری اور اخلاقی طرز عمل کی اقدار کو پروان چڑھانے میں اہم کردار ادا کرتی ہیں۔ مقررین نے طالبات کی حوصلہ افزائی کی کہ وہ اپنے معاشرے میں دیانت داری کی سفیر بنیں۔ کالج کی پرنسپل نے آگاہی سیشن کے انعقاد پر نیب ملتان کی کوششوں کو سراہا اور نوجوانوں، بالخصوص طالبات میں اخلاقی اقدار اور شہری ذمہ داریوں کے فروغ کے اقدامات کی حمایت کرنے کے عزم کا اعادہ کیا۔ طالبات کو مزید متحرک کرنے کے لیے کالج کی حدود میں ایک آگاہی واک بھی کی گئی تاکہ احتساب کی ثقافت کو فروغ دیا جا سکے۔