ملتان: ایران کے سپریم لیڈر آیت اللہ علی خامنہ ای کی شہادت اور دیگر قیادت کے ساتھ ہونے والے سانحے پر ہم گہرے دکھ اور شدید غم کا اظہار کرتے ہیں۔ یہ ایک بزدلانہ اور منصوبہ بند حملہ تھا جس میں اسرائیلی اور امریکی جارحیت نے نہ صرف ایک عظیم رہنما کو شہید کر دیا بلکہ ایران کی اسلامی جمہوریہ کی قیادت کو نشانہ بنا کر خطے کی استحکام کو شدید دھچکا پہنچایا۔ آیت اللہ خامنہ ای کی شہادت ایک ایسے مجاہد کی قربانی ہے جس نے کئی دہائیوں تک امریکی اور صیہونی استعمار کے خلاف مزاحمت کی قیادت کی، اور ان کی شہادت ہمیں یاد دلاتی ہے کہ حق کی راہ میں قربانیاں ہی ظالموں کی شکست کا سبب بنتی ہیں۔ ہم اس سانحے کو نہ صرف ایران بلکہ پوری امت مسلمہ پر حملہ قرار دیتے ہیں۔ ان خیالات کا اظہار پاکستان تحریک انصاف کے رہنما اور قانوندان بیرسٹر ملک محمد عثمان ڈوگر نے ایران کے سپریم لیڈر آیت اللہ علی خامنائی و دیگر رہنماوّں کی شہادت اور ایران پر اسرائیلی و امریکی جارحیت کے خلاف اپنے ایک مزمتی بیان میں اظہار خیال کرتے ہوئے کیا۔ انہوں نے کہا کہ اسرائیلی اور امریکی جارحیت کی مذمت کرتے ہوئے ہم کہتے ہیں کہ یہ کھلی خلاف ورزی ہے بین الاقوامی قوانین کی، خودمختاری کی اور انسانی حقوق کی۔ یہ حملے نہ صرف ٹیہران میں بے گناہوں کی جان لے گئے بلکہ ایک خودمختار ملک پر مسلط کیے گئے جنگی جرائم ہیں جو صیہونی رڑیم اور اس کے امریکی حامیوں کی توسیع پسندانہ پالیسیوں کی عکاسی کرتے ہیں۔ ایران کی سرزمین پر یہ وحشیانہ جارحیت خطے کو جنگ کی آگ میں دھکیلنے کا واضح ثبوت ہے، اور ہم اسے عالمی امن کے لیے ایک سنگین خطرہ قرار دیتے ہیں۔ ایسے حملوں سے ظالموں کو عارضی فائدہ ہو سکتا ہے مگر تاریخ گواہ ہے کہ مظلوموں کی قربانیاں ہمیشہ فتح کی بنیاد بنتی ہیں۔ بیرسٹر ملک محمد عثمان ڈوگر نے کہا کہ اس موقع پر ہم ایران کے عوام اور باقی ماندہ قیادت سے اظہار یکجہتی کرتے ہیں اور مطالبہ کرتے ہیں کہ عالمی برادری، مسلم ممالک اور انصاف پسند قوتیں اس جارحیت کے خلاف متحد ہو کر آواز اٹھائیں۔ آیت اللہ خامنہ ای اور دیگر شہداءکی شہادت ہمیں مزید پختہ عزم دیتی ہے کہ مزاحمت کی راہ جاری رکھی جائے گی۔ اللہ تعالیٰ ان شہداءکو جنت الفردوس میں اعلیٰ مقام عطا فرمائے اور ایران کو اس آزمائش سے نکل کر مزید مضبوط بنائے۔ ان شاءاللہ، یہ شہادتیں صیہونی اور امریکی جارحیت کی حتمی شکست کا پیش خیمہ ثابت ہوں گی۔