رمضان المبارک برکتوں رحمتوں اور احساسِ انسانیت کا مہینہ

تحریر: ایس پیرزادہ

شعبان المعظم کی ساعتیں رخصت ہوئیں اور رحمتوں کا تاجدار مہینہ رمضان المبارک اپنی پوری شان کے ساتھ ہمارے دروازے پر دستک دے چکا ہے یہ وہ مہینہ ہے جسے اللہ تعالیٰ نے اپنی خاص رحمتوں برکتوں اور مغفرت کے لیے منتخب فرمایا قرآنِ مجید میں ارشادِ باری تعالیٰ ہے
يَا أَيُّهَا الَّذِينَ آمَنُوا كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِن قَبْلِكُمْ لَعَلَّكُمْ تَتَّقُونَ
(اے ایمان والو! تم پر روزے فرض کیے گئے جیسے تم سے پہلے لوگوں پر فرض کیے گئے تھے تاکہ تم متقی بن جاؤ)
رمضان صرف بھوک اور پیاس کا نام نہیں بلکہ یہ صبر شکر برداشت ہمدردی اور ایثار کا عملی درس ہے یہ وہ مہینہ ہے جو ہمیں احساس دلاتا ہے کہ دنیا میں ایسے بھی لوگ ہیں جو سارا سال فاقوں اور تنگ دستی کا سامنا کرتے ہیں آج کے حالات میں، جب مہنگائی اور بے روزگاری نے عام آدمی کو شدید مشکلات میں مبتلا کر رکھا ہے بہت سے سفید پوش خاندان خاموشی سے کرب سہہ رہے ہیں۔ ان کے چہروں پر غیرت کی چادر ہے مگر دلوں میں فاقوں کی چبھن
رمضان ہمیں یہی سکھاتا ہے کہ ہم اپنے دل بڑے کریں اپنے دسترخوان وسیع کریں اور ضرورت مندوں کو اپنے ساتھ شامل کریں افطار دسترخوان صرف اپنے گھر تک محدود نہ رکھیں بلکہ کسی مستحق کے گھر بھی دستک دیں کسی سفید پوش کے دروازے پر راشن کا تھیلا خاموشی سے رکھ دینا کسی یتیم کے ہاتھ میں افطاری کا سامان تھما دینا کسی بیوہ کے گھر سحری کا انتظام کر دینا یہی وہ اعمال ہیں جو اس مہینے کی اصل روح ہیں۔
نبی کریم صلی اللہ علیہ وآلہ وسلم نے فرمایا کہ جو کسی روزہ دار کو افطار کرائے اسے بھی روزہ دار کے برابر اجر ملتا ہے یہ کتنا عظیم موقع ہے کہ ہم اپنے مال وقت اور محبت کو اللہ کی راہ میں خرچ کریں اور اپنی آخرت سنوار لیں
رمضان قرآن کا مہینہ ہے۔ اسی مہینے میں قرآن نازل ہوا یہ وہ مہینہ ہے جس میں ہر نیکی کا اجر کئی گنا بڑھا دیا جاتا ہے ہمیں چاہیے کہ تلاوتِ قرآن نمازِ تراویح ذکر و اذکار اور دعا کا خاص اہتمام کریں۔ اپنے گھروں میں ایسا ماحول بنائیں کہ بچے بھی اس نورانی فضا کا حصہ بنیں سحری کے وقت انہیں جگائیں افطاری کی تیاری میں شامل کریں انہیں بتائیں کہ روزہ صرف بھوک برداشت کرنا نہیں بلکہ زبان آنکھ کان اور دل کو بھی برائی سے بچانا ہے
اپنے بچوں کو رمضان کی روح سے آشنا کرنا ہماری ذمہ داری ہے۔ جب وہ اپنے والدین کو سحری کے وقت دعا میں ہاتھ اٹھاتے، افطار کے وقت شکر ادا کرتے اور ضرورت مندوں کی مدد کرتے دیکھیں گے تو ان کے دلوں میں بھی نیکی اور خدمت کا جذبہ پروان چڑھے گا یہی تربیت آنے والی نسلوں کو باکردار بناتی ہے
آج معاشرے کو سب سے زیادہ جس چیز کی ضرورت ہے وہ ہے احساس اور اتحاد رمضان ہمیں جوڑنے آتا ہے، توڑنے نہیں یہ مہینہ نفرتوں کو ختم کرنے اور دلوں کو قریب لانے کا پیغام دیتا ہے اگر ہم نے اس مہینے میں بھی ایک دوسرے کا درد محسوس نہ کیا تو پھر کب کریں گے؟
آئیے عہد کریں کہ اس رمضان کو محض رسم نہیں بنائیں گے بلکہ اس کی اصل روح کو اپنائیں گے اپنے اردگرد نظر دوڑائیں کسی کی آنکھ میں چھپا آنسو تلاش کریں کسی کے خالی دسترخوان کو آباد کریں کسی کے بچے کے چہرے پر مسکراہٹ لے آئیں یقین جانئے جب آپ کسی اور کے لیے آسانی پیدا کرتے ہیں تو اللہ آپ کے لیے راستے کھول دیتا ہے
رمضان رحمتوں کا مہینہ ہے برکتوں کا مہینہ ہے مغفرت کا مہینہ ہے یہ ہمیں خود احتسابی، صبر اور قربانی کا درس دیتا ہے دعا ہے کہ اللہ تعالیٰ ہمیں اس بابرکت مہینے کی قدر کرنے اس کے حقوق ادا کرنے اور زیادہ سے زیادہ نیکیاں سمیٹنے کی توفیق عطا فرمائے۔ آمین ثم آمین
قارئین کے لیے میرا پیغام
اس رمضان اپنے دلوں کو روشن کریں اپنے گھروں کو قرآن کی خوشبو سے معطر کریں اور اپنے معاشرے کو محبت ہمدردی اور خدمت کے رنگ میں رنگ دیں یہی رمضان کا اصل پیغام ہے یہی کامیابی کا راستہ ہے