ملتان : پاکستان انٹرنیشنل اسکول ملتان کے طلبہ نے  پنجاب اسمال انڈسٹریز کارپوریشن (ڈائریکٹوریٹ ملتان ڈویژن) کا معلوماتی اور تربیتی دورہ کیا۔ اس دورے کا مقصد طلبہ میں صنعتی اور کاروباری شعور کو فروغ دینا اور انہیں عملی میدان سے روشناس کرانا تھا۔ دورے کے دوران متعلقہ افسران نے طلبہ کو آگاہ کیا کہ مقامی صنعتیں کس انداز سے کام کرتی ہیں، ایک کامیاب کاروبار کا آغاز کن مراحل سے ہو کر گزرتا ہے، اور کون کون سے سرکاری و ادارہ جاتی شعبے کاروباری منصوبہ بندی اور ابتدائی سرمایہ کے حصول میں معاونت فراہم کرتے ہیں۔ طلبہ کو مختلف پیشہ ورانہ شعبہ جات، صنعتی ترقی کے مواقع اور نوجوانوں کے لیے حکومتی سہولیات سے بھی آگاہ کیا گیا۔ اس موقع پر اسکول انتظامیہ کا کہنا تھا کہ ایسے تعلیمی و تربیتی دورے طلبہ کی شخصیت سازی، قائدانہ صلاحیتوں کے فروغ اور عملی سوچ کی آبیاری میں اہم کردار ادا کرتے ہیں۔ انہوں نے کہا کہ تعلیمی نظریات کو عملی زندگی سے جوڑنا وقت کی اہم ضرورت ہے تاکہ طلبہ مستقبل کے چیلنجز کا اعتماد کے ساتھ سامنا کر سکیں۔ طلبہ نے اس دورے کو نہایت مفید اور حوصلہ افزا قرار دیتے ہوئے کہا کہ انہیں صنعت، کاروبار اور مستقبل کے کیریئر کے انتخاب کے حوالے سے قیمتی معلومات حاصل ہوئیں۔ یہ دورہ بلاشبہ طلبہ کو باصلاحیت، بااعتماد اور ذمہ دار شہری بنانے کی جانب ایک مؤثر قدم ثابت ہوا۔