ملتان: پاکستان پبلک ٹرانسپورٹ فیڈریشن جنوبی پنجاب کے صدر رانا محمد اصغر نے کہا ہے کہ ڈیزل کی قیمتوں میں کمی کا براہِ راست فائدہ عوام تک پہنچایا جا رہا ہے، اور اسی سلسلے میں ٹرانسپورٹ کرایوں میں 22 سے 25 فیصد تک نمایاں کمی کر دی گئی ہے۔ انہوں نے کہا کہ فیڈریشن کے تمام اراکین کو ہدایت جاری کر دی گئی ہے کہ نئی کرایہ نامہ پر مکمل اور سختی سے عمل درآمد یقینی بنایا جائے، تاکہ مسافروں کو حقیقی ریلیف مل سکے۔ ان کے مطابق بس اڈوں اور ٹرانسپورٹ اسٹینڈز پر عوامی آگاہی کے لیے کرایوں میں کمی کے واضح پینا فلیکس بھی آویزاں کر دیے گئے ہیں۔ان کا کہنا تھا کہ موجودہ حالات میں عوامی مشکلات کو مدنظر رکھتے ہوئے ٹرانسپورٹ سیکٹر نے ذمہ دارانہ کردار ادا کیا ہے اور یہ اقدام عوام دوستی کی ایک عملی مثال ہے۔