ملتان : 26جنوری کو دنیا بھر میں عالمی یومِ صاف توانائی منایا جا رہا ہے، جس کا مقصد ماحول دوست، سستی اور پائیدار توانائی کے فروغ کے ذریعے موسمیاتی تبدیلی کے اثرات کو کم کرنا ہے۔ان خیالات کا اظہار ملک اشرف اقبال بھٹہ نے اپنے ایک بیان میں کہا انہوں نے کہا کہ اس دن کو منانے کا مقصد عوام میں صاف توانائی جیسے شمسی، ہوائی اور آبی وسائل کی اہمیت اجاگر کرنا اور فوسل فیول پر انحصار کم کرنے کی ترغیب دینا ہے۔ماہرین کے مطابق صاف توانائی نہ صرف فضائی آلودگی میں کمی لاتی ہے بلکہ معاشی ترقی، روزگار کے نئے مواقع اور توانائی کے محفوظ مستقبل کی ضمانت بھی فراہم کرتی ہے۔ پاکستان جیسے ترقی پذیر ممالک کے لیے قابلِ تجدید توانائی سستی بجلی، دیہی ترقی اور ماحولیاتی تحفظ میں کلیدی کردار ادا کر سکتی ہے۔اس موقع پر تعلیمی اداروں، سماجی تنظیموں اور ماہرینِ ماحولیات نے حکومت اور عوام پر زور دیا کہ وہ شمسی پینلز، ونڈ پاور اور دیگر صاف توانائی کے منصوبوں کو اپنائیں تاکہ آنے والی نسلوں کے لیے ایک صحت مند اور محفوظ ماحول یقینی بنایا جا سکے۔عالمی یومِ صاف توانائی ہمیں یہ یاد دہانی کراتا ہے کہ صاف توانائی کی طرف منتقلی ہی ایک روشن، سرسبز اور پائیدار مستقبل کی کنجی ہے۔