کراچی ;  الیکشن کمیشن نے کراچی اور حیدرآباد کی ڈویژنز میں بلدیاتی انتخابات 15جنوری 2023 کو کرانے کا حکم جاری کر دیا ہے، ساتھ ہی متعلقہ اداروں کو سیکیورٹی انتظامات کو مکمل کرنے کی ہدایت کی گئی ہے۔   الیکشن کمیشن نے کراچی  اور حیدر آباد میں بلدیاتی انتخابات کرانے سے متعلق محفوظ فیصلہ سنا دیا ہے، جس میں کہا گیا ہے کہ  کراچی اور حیدر آباد  کی ڈویژنز میں 15جنوری 2023کو الیکشن  ہو گا۔ واضح رہے کہ  الیکشن کمیشن نے اس سے قبل بلدیاتی انتخابات کے پہلے مرحلے میں اندرونی سندھ میں الیکشن کرائے تھے ، لیکن دوسرے مرحلے میں الیکشن کرانے کیلئے کراچی اور حیدر آباد کی ڈویژنز میں الیکشن سے قبل سیلاب کی صورتحال سامنے آگئی جس کے لیے الیکشن ملتوی ہوئے اور اس کے بعد سندھ حکومت نے بار بار الیکشن کمیشن کو کہا کہ کراچی کے بلدیاتی انتخابات 3ماہ کیلئے ملتوی کر دیئے جائیں اسی تناظر میں الیکشن کمیشن نے 15نومبر کو سماعت کی ، جس میں کراچی اور حیدر آباد کی تمام بڑی پارٹیوں کو سنا اور اسی سماعت میں سیکریٹری اور چیف سیکریٹری سندھ کو بھی سنا گیا ، جس کے بعد بلدیاتی انتخابات سے متعلق فیصلہ محفوظ کر لیا گیا جو اب سنا دیا گیا ہے ۔