لاہو/ملتان: ملک بھر کی تمام ڈسکوز میں بجلی کی صورتحال ابتر ہو گئی۔  ذرائع کا کہنا ہے کہ بجلی کا اوسط شارٹ فال ساڑھے 3 ہزار میگاواٹ سے بھی بڑھ گیا جس کے باعث لاہور سمیت پنجاب بھر میں غیر اعلانیہ لوڈشیڈنگ میں اضافہ ہو گیا ہے۔لسیکو میں شارٹ فال 1 ہزار میگاواٹ سے زیادہ ہو گیا ہے۔ نیشنل ٹرانسمیشن اینڈ ڈسپیچ کمپنی (این ٹی ڈی سی) کے ذرائع کے مطابق آر ایل این جی ہائیڈرو اور آئل کی قلت کے باعث زیادہ لوڈشیڈنگ ہو رہی ہے، جان بوجھ کر لوڈشیڈنگ کا شیڈول نہ دینا غیر اعلانیہ بندش کا باعث بن رہا ہے۔ ذرائع این ٹی ڈی سی کے مطابق 2 کے بجائے 6، 6 گھنٹے کی لوڈشیڈنگ جاری ہے اور یہ سلسلہ کئی روز تک جاری رہنے کا امکان ہے۔