شمالی وزیرستان : شمالی وزیرستان کے علاقے میر علی میں سکیورٹی فورسز اور دہشتگردوں میں فائرنگ کا تبادلہ ہوا، پاک فوج کے شعبہ تعلقات عامہ (آئی ایس پی آر ) کے مطابق سکیورٹی فورسز نے مؤثر انداز میں دہشت گردوں کے ٹھکانوں کو نشانہ بنایا، دہشتگردوں سے فائرنگ کے شدید تبادلے کے نتیجے میں 28 سالہ لانس نائیک جمشید خان جام شہادت نوش کرگئے۔ان کا تعلق خیبرپختونخوا کے ضلع اپر دیر سے ہے۔ آئی ایس پی آر کا مزید کہنا ہے کہ علاقے میں دہشتگردوں کے خاتمے کے لیے سرچ آپریشن جاری ہے،پاکستان کی سکیورٹی فورسز دہشتگردی کی لعنت کے خاتمے کے لیے پر عزم ہیں ،ہمارے جوانوں کی قربانیاں دہشت گردی کے خلاف ہمارے عزم کو مزید مستحکم کرتی ہیں۔