لاہور: پاکستان تحریک انصاف کے چیئرمین عمران خان نے لاہور ہائیکورٹ سے استدعا کی ہے کہ وہ عید کی چھٹیوں میں ہونے والے ممکنہ آپریشن سے حکومت کو روک دیں۔ عمران خان کی جانب سے 121 مقدمات ختم کرنے کی درخواست پر لاہور ہائی کورٹ میں دو رکنی بینچ نے سماعت کی، جس میں پنجاب حکومت کے وکیل نے درخواست پر اعتراض بھی اٹھایا۔ جسٹس طارق کلیم شیخ نے پنجاب حکومت کے وکیل سے پوچھا کہ کیا آپ یقین دہانی کراسکتے ہیں کہ پرانے معاملے پر نئی ایف آئی آر درج کر کے کارروائی نہیں کی جائے گی۔ عمران خان نے روسٹروم پر آکر کہا کہ ’سر پلیز انہیں آپریشن کرنے سے روکیں، عید کی چھٹیوں میں پھر سے آپریشن کرنے کا منصوبہ ہے، یہ مجھے صرف جیل میں ڈالنا نہیں چاہتے بلکہ ختم کرنا چاہتے ہیں، آخری بار آپ نے آپریشن روکا مگر اگلے ہی دن حملہ ہوگیا اور انہوں نے توہین عدالت کی‘۔ چیئرمین پی ٹی آئی نے کہا کہ ہمیں اس سسٹم پر اعتماد ہی نہیں رہا، یہ الیکشن ہارنے سے ڈرے ہوئے ہیں‘۔ لاہور ہائیکورٹ کے دو رکنی بینچ نے درخواست پر لارجر بینچ تشکیل دینے کے لیے معاملہ چیف جسٹس لاہور ہائیکورٹ کو بھیج دیا۔