رجب المرجب کا چاند روحانی بیداری خاندانی تربیت اور رمضان کی تیاری کا مہینہ

تحریر: ایس پیرزادہ

رجب المرجب کا چاند نظر آتے ہی دل خود بخود اُن مہینوں کی طرف متوجہ ہو جاتا ہے جو انسان کو اللہ کے قریب کرنے کے لیے آتے ہیں رجب اسلامی سال کا وہ مہینہ ہے جو خاموشی سے آنے والے دنوں کی تیاری کرواتا ہے یہ مہینہ اپنی حرمت کے باعث بھی اہم ہے اور اس لیے بھی کہ یہی وہ وقت ہے جب شعبان اور رمضان کی تیاری شروع ہوتی ہے رجب ہمیں یہ احساس دلاتا ہے کہ رمضان اچانک نہیں آتا بلکہ اس تک پہنچنے کے لیے خود کو سنبھالنا اور بدلنا پڑتا ہے
قرآنِ کریم میں اللہ تعالیٰ نے واضح فرمایا ہے کہ سال کے بارہ مہینوں میں چار مہینے حرمت والے ہیں اور رجب بھی انہی میں شامل ہے ان مہینوں میں نیکی کی قدر بڑھ جاتی ہے اور انسان کو خاص طور پر اپنے اعمال پر نظر رکھنے کی تلقین کی جاتی ہے رجب انسان کو رک کر اپنے اندر جھانکنے کا موقع دیتا ہے کہ وہ اپنی زندگی کا رخ درست کر سکے نبی کریم صلی اللہ علیہ وآلہ وسلم کی وہ دعا جس میں رجب شعبان اور رمضان کا ذکر آتا ہے ہمیں ایک سیدھا اور واضح راستہ دکھاتی ہے اس دعا میں رجب کو تیاری کا، شعبان کو عادت بنانے کا اور رمضان کو اللہ کے قریب ہونے کا مہینہ بتایا گیا ہے یہی وجہ ہے کہ اہلِ علم کہتے ہیں کہ رجب میں انسان خود کو سنبھالتا ہے شعبان میں خود کو بہتر بناتا ہے اور رمضان میں اپنی روح کو مضبوط کرتا ہے رجب کا پیغام صرف عبادت تک محدود نہیں بلکہ نظم تربیت اور روزمرہ زندگی میں توازن پیدا کرنے کا بھی ہے یہی تربیت میں نے اپنے گھر میں دیکھی میرے والد صاحب پاکستان آرمی سے وابستہ رہے انہوں نے عملی طور پر فوجی زندگی تو ایک مرحلے پر چھوڑ دی مگر نظم و ضبط اصول پسندی اور دیانت کو کبھی نہیں چھوڑا ان کا کہنا تھا کہ وردی اتاری جا سکتی ہے مگر اصول نہیں نماز ان کی زندگی کا مرکز تھا یہ کبھی نہیں ہوا کہ ہمارے گھر میں فجر کے وقت کوئی سویا رہ جائے والد صاحب خود فجر کے وقت ہم سب بہن بھائیوں اور گھر کے تمام افراد کو جگاتے تھے اور ہم سب باجماعت نماز ادا کرتے تھے اسی طرح عشاء کی نماز کے بعد پورے گھر میں سونے کا اہتمام کیا جاتا عشاء کے بعد جاگنا معمول نہیں تھا ان کا ماننا تھا کہ دن کی شروعات فجر سے اور اختتام عشاء پر ہونا چاہیے یہ طرزِ عمل ہمیں عبادت کے ساتھ وقت کی پابندی اور ذمہ داری کا سبق دیتا تھا والد صاحب ہمیشہ کہا کرتے تھے کہ رجب شعبان اور رمضان ایک دوسرے سے جڑے ہوئے مہینے ہیں ان کے مطابق رجب خود کو سنبھالنے کا شعبان خود کو بہتر بنانے کا اور رمضان خود کو اللہ کے حوالے کرنے کا مہینہ ہے یہ بات ہمیں زبانی نہیں بلکہ عملی طور پر سکھائی گئی اسی لیے اس کی اہمیت دل میں بیٹھ گئی رجب کی نسبت واقعۂ معراج سے بھی جوڑی جاتی ہے جس نے اس مہینے کو مزید اہم بنا دیا ہے یہ وہ واقعہ ہے جس میں نماز کا تحفہ امت کو ملا اور یہی نماز رجب کی تیاری شعبان کی مشق اور رمضان کی روح کو آپس میں جوڑتی ہے رجب کا چاند ہمیں یہ یاد دہانی کرواتا ہے کہ اگر گھروں میں نماز کا اہتمام ہو اگر والدین اپنی عملی مثال سے تربیت کریں اور اگر عبادت کو رسم کے بجائے عادت بنایا جائے تو رمضان خود بخود زندگی میں اثر دکھاتا ہے یہ مہینہ ہمیں اپنے گھروں اور اپنی نسلوں پر دوبارہ غور کرنے کا موقع دیتا ہے
رجب المرجب کی آمد پر دعا ہے کہ اللہ تعالیٰ ہمیں اس مہینے کی قدر کرنے اس سے سیکھنے اور اپنی زندگی میں بہتری لانے کی توفیق عطا فرمائے، اور ہمیں شعبان کے ذریعے مضبوط اور رمضان کے ذریعے بہتر انسان بننے کا موقع دے
آمین