ملتان (صفدر بخاری سے) ملتان شہر میں فٹنس کے فروغ اور نوجوانوں کو صحت مندانہ سرگرمیوں کی طرف مائل کرنے کے لیے اعجازالحسن چیئرمین باڈی بلڈنگ ایسوسی ایشن کی زیرِ نگرانی چلنے والے حسن جم میں ایک دلچسپ اور جوش و خروش سے بھرپور مقابلے کا انعقاد کیا گیا۔ اس مقابلے میں جم کے ہی ٹرینرز اور ممبران نے بھرپور تیاری کے ساتھ حصہ لیا۔ یہ مقابلہ جمعرات کی رات کو حسن جم، لودھی کالونی ملتان میں منعقد ہوا جو رات 9 بجے شروع ہوا اور تقریباً چار گھنٹے تک جاری رہا۔ شرکاء نے اپنی فٹنس، باڈی بلڈنگ اور ٹریننگ کی صلاحیتوں کا مظاہرہ کیا۔ تماشائیوں اور دیگر جم ممبران نے بڑی تعداد میں موجود رہ کر اپنے پسندیدہ ٹرینرز کو سپورٹ کیا، جس سے ماحول نہایت پرجوش اور مسابقتی رہا۔ مقابلہ اتنا سخت اور دلچسپ تھا کہ رات ایک بجے تک جاری رہنے کے باوجود مکمل نہ ہو سکا، جس کے بعد منتظمین نے فیصلہ کیا کہ باقی حصہ سات ستمبر بروز ہفتہ رات 9 بجے دوبارہ شروع کیا جائے گا۔ اسی روز حتمی نتائج کا اعلان کیا جائے گا اور یہ طے ہوگا کہ کس ٹرینر نے سب سے بہتر کارکردگی دکھائی۔ منتظمین کے مطابق اس مقابلے کا مقصد محض ایک ٹائٹل جیتنا نہیں بلکہ لوگوں میں فٹنس کے رجحان کو بڑھانا اور نوجوانوں کو مثبت سرگرمیوں کی طرف مائل کرنا ہے۔ ان کا کہنا تھا کہ آج کے دور میں جہاں فاسٹ فوڈ اور غیر متوازن طرزِ زندگی نے صحت کو شدید متاثر کیا ہے، وہاں اس طرح کے مقابلے عوام کو ورزش اور جسمانی مضبوطی کی اہمیت یاد دلاتے ہیں۔ یہ بھی بتایا گیا کہ مقابلے کے اختتام پر پہلی اور دوسری پوزیشن حاصل کرنے والے ٹرینرز کو انعامات دیئے جائیں گے تاکہ ان کی حوصلہ افزائی ہو اور دیگر ممبران بھی آئندہ زیادہ محنت کریں۔ شرکاء اور حاضرین نے اس ایونٹ کو سراہتے ہوئے کہا کہ ملتان جیسے شہروں میں ایسے صحت مندانہ مقابلے وقت کی ضرورت ہیں کیونکہ یہ نہ صرف نوجوانوں کو مصروف رکھتے ہیں بلکہ انہیں منشیات اور منفی سرگرمیوں سے بھی دور کرتے ہیں۔