ملتان : ایم کیو ایم پاکستان کے سیکریٹری جنرل پنجاب کرامت علی شیخ نے کہا ہے کہ ملک بھر کی طرح اپر پنجاب اور بالخصوص ملتان سمیت جنوبی پنجاب میں مون سون بارشوں کے پیش نظر حکومتِ پنجاب شہریوں کے جان و مال کے تحفظ کے لیے مؤثر اقدامات کرے۔ انہوں نے مطالبہ کیا کہ سیلابی علاقوں میں حفاظتی بندوں کو مزید مضبوط کیا جائے۔ کرامت علی شیخ نے کہا کہ حکومتِ پاکستان اور ورلڈ بینک کے درمیان 10 سالہ کنٹری پارٹنرشپ فریم ورک سے ملکی معیشت میں بہتری آئے گی اور موسمیاتی تبدیلی جیسے اہم مسائل کے حل کی جانب ٹھوس پیش رفت ہوگی۔ انہوں نے زور دیا کہ حکومت کو مہنگائی اور معاشی بدحالی سے نجات کے لیے بے روزگاری کے خاتمے پر خصوصی توجہ دینی چاہیے۔ پڑھے لکھے نوجوانوں کے لیے روزگار کے مزید مواقع فراہم کیے جائیں اور قومی شناختی کارڈ پر 10 لاکھ روپے تک قرض کی آسان فراہمی یقینی بنائی جائے تاکہ مڈل کلاس محنت کش طبقہ اپنے خاندان کی بہتر کفالت کر سکے۔ انہوں نے کہا کہ ایم کیو ایم پاکستان پارلیمنٹ کے اندر اور باہر عوامی مسائل کے حل کے لیے اپنی جدوجہد جاری رکھے ہوئے ہے۔