تل ابیب : اسرائیل کے دارالحکومت تل ابیب میں ہزاروں مظاہرین نے فوجی ہیڈکوارٹرز کے باہر احتجاج کرتے ہوئے وزیراعظم بنیامین نیتن یاہو کی پالیسیوں کو شدید تنقید کا نشانہ بنایا ہے۔ مظاہرین کا مطالبہ تھا کہ غزہ میں فوری جنگ بندی کی جائے اور حماس کے قبضے میں موجود اسرائیلی یرغمالیوں کی واپسی یقینی بنائی جائے۔ شرکاء نے حکومت پر الزام عائد کیا کہ وہ سیاسی مفادات کے تحت جنگ کو طول دے رہی ہے، جس سے صرف تباہی اور انسانی بحران جنم لے رہا ہے۔ اس دوران اسرائیلی میڈیا نے رپورٹ کیا ہے کہ وزیراعظم نیتن یاہو نے ممکنہ جنگ بندی ڈیل پر مشاورت کے لیے دائیں بازو کے اتحادی وزراء ایتمار بن گویر اور بیزلیل سموٹریچ کو طلب کر لیا ہے۔ یہ مظاہرے ایسے وقت میں ہو رہے ہیں جب نیتن یاہو پر نہ صرف داخلی بلکہ بین الاقوامی دباؤ بھی بڑھ رہا ہے کہ وہ جنگ کے خاتمے اور قیدیوں کی رہائی کے لیے پیش رفت کریں۔