ملتان (صفدر بخاری سے) ضلع ملتان میں 12 اکتوبر سے شروع ہونے والی قومی انسدادِ پولیو مہم کی تیاریوں کا جائزہ لینے کے لیے ڈپٹی کمشنر وسیم حامد سندھو کی ہدایت پر محکمہ صحت کی جانب سے پولیو ٹیموں کی تربیتی ورکشاپس کا سلسلہ جاری ہے۔ اس سلسلے میں ڈپٹی کمشنر نے خود بھی تربیتی ورکشاپ کا دورہ کیا اور فیلڈ اسٹاف کی تیاریوں کا تفصیلی جائزہ لیا۔ اس موقع پر ڈپٹی کمشنر نے کہا کہ پولیو کے مکمل خاتمے کے لیے تمام دستیاب وسائل بروئے کار لائے جائیں گے اور مہم کی مؤثر مانیٹرنگ کو ہر سطح پر یقینی بنایا جائے گا۔ انہوں نے والدین سے اپیل کی کہ وہ اپنے پانچ سال سے کم عمر بچوں کو پولیو کے قطرے ضرور پلائیں، کیونکہ بچوں کو پولیو سے محفوظ رکھنا ہم سب کی مشترکہ ذمہ داری ہے۔ ڈپٹی کمشنر وسیم حامد سندھو نے محکمہ صحت کے افسران سے بریفنگ بھی لی اور مہم کے دوران درپیش ممکنہ مسائل اور ان کے حل پر تبادلہ خیال کیا۔ انہوں نے کہا کہ پولیو مہم ایک قومی ذمہ داری ہے، اس لیے کسی قسم کی غفلت یا کوتاہی برداشت نہیں کی جائے گی۔ تربیتی ورکشاپ میں فیلڈ اسٹاف کو حفاظتی اقدامات، رپورٹنگ کے جدید طریقہ کار، ٹیموں کی فیلڈ کارکردگی بہتر بنانے اور والدین سے رابطہ بڑھانے کے مؤثر انداز پر تفصیلی آگاہی دی گئی۔ ڈپٹی کمشنر نے ٹیموں کو ہدایت کی کہ وہ مقررہ ہدف کے حصول کے لیے پوری محنت، لگن اور ذمہ داری سے فرائض انجام دیں تاکہ ضلع ملتان کو پولیو فری بنانے کے قومی ہدف کو حاصل کیا جا سکے۔